OPEN HEAVENS
MATALA LE LAGI MO LE ASO GAFUA 31 AOKUSO 2026
(tusia e Pastor EA Adeboye)
Manatu Autu: Toaga e lūlū pea (Just keep sowing)
Tauloto Tusi Paia: Kalatia 6:9 “Aua ne‘i tatou fa‘apalapala i le amio lelei; auā o ona po e tatau ai tatou te selesele mai ai, pe ‘āfai tatou te lē fa‘avaivai.”
Faitauga - Tusi Paia: Failauga 11:1-6
O nisi tagata a latou ausia loa nisi o faamoemoega mo latou olaga, ona lē toe faia loa lea o mea sa fesoasoani i le ausia o ia manuia. E lē umi se taimi, ae latou iloa ua amata ona alualu i tua.
Fai mai le Kenese 26:12-14 “‘Ona lūlūina lea e Isaako o saito i lea nu‘u, na maua ai fo‘i le ta‘iselau i fua i lea tausaga; na fa‘amanuia fo‘i e le ALI‘I ‘iā te ia. ‘Ua tagata ola lenei tagata, ‘ua tupu pea lava, ‘ua atili ai ‘ua o‘o ‘ina matuā tagata ola lava ia; auā sa ‘iā te ia le lafu mamoe ma lafu povi ma ‘au‘auna e to‘atele; ‘ua loto leaga fo‘i Filisitia ‘iā te ia.”
Na lūlū Isaako i le taimi o le oge aua na faatonu e le Atua e aua le tuua le nuu lea (Kenese 26:2). Na ia lūlū i le tausaga muamua ona ia maua lea o fua e taiselau. E lei gata ai iina. Ou te manatu i le tausaga lona lua, na ia toe lūlū foi, aua foi na ia maua fua e taiselau mai mea na ia lūlū i le tausaga muamua, o ia fua e sili atu i mea sa ia te ia, o lea na ia lūlū fatu e taiselau e sili atu i fatu na lūlū i le tausaga muamua, ona ia maua lea o fua e sili atu. Ou te manatu ao ia lūlū i le faiga lava lea e tasi i tausaga na sosoo ai, na matua faateleina le fua o mea na ia maua. O le taui, ua alualu pea i luma ana taumafaiga ma oo ina matua tagata ola ma mauoloa. Ua matua mauoloa ua oo i le tupu o le atunuu ua sau ia Isaako ma fai iai ua ia matuā tagata ola e sili atu i le atunuu atoa, e ui o ia o se tagata o nuu ese (Kenese 26:16). E lei taofi le lūlū pea o Isaako ina ua ia ausia se vaega o oloa, na ia lūlū pea ma agai pea i luma seia oo ina loto leaga le atunuu atoa ia te ia ona o lona mauoa.
O le mea moni, ua na o le Atua e foai mai le oloa ma le tamaoaiga. I le 1 Korinito 3:6, fai mai Paulo “Na ‘ou totōina, na fa‘asūsūina e Apolo; ‘ae peita‘i o le Atua na fa‘atupuina.” E ono totōina e Paulo, e ono faasūsūina e Apolo, peitai e na o le Atua e faatupuina. Peitai e leai se faatupuina pe afai e leai se mea e lūlūina pe faasūsūina. O lona uiga o le tele o mea e te lūlū, o le tele foi lea o fua e te selesele. I le faavae o le aoaoga o le lūlū ma le selesele, a lē toe lūlū ma fasūsū se tagata, o le a taofia le tafe mai o le tamaoaiga ma le faatupuina. Le au pele e, aua e te augata e lūlū pea aua o le ki lea e tatala ai le mauoloa faifai pea.
Tatalo
Tamā, faamolemole foai mai ia te a’u le alofa tunoa e lūlū ai pea i le taimi o fuata ma taimi e lē o le fuata, i le suafa o Iesu, Amene.
