OPEN HEAVENS
MATALA LE LAGI MO LE ASO GAFUA 24 AOKUSO 2026
(tusia e Pastor EA Adeboye)
Manatu Autu: Leai se mea lelei e tuuina atu (Nothing good to offer)
Tauloto Tusi Paia:Iakopo 4:7 “O le mea lea ‘ia ‘outou gaua‘i ai i le Atua; ‘ia ‘outou tete‘e atu i le tiapolo, ‘ona sola ‘ese ai lea o ia ‘iā te ‘outou.”
Faitauga - Tusi Paia: Luka 11:24-26
E lua ituaiga tagata e saisaitia e le tiapolo, o e loto malie ma e ave faamalosi. O se tagata e ave faamalosi, o se tasi na ulufale i le mailei a le tiapolo ma o lea ua fia saoloto. O lea tagata e mafai ona faasaolotoina mai le tiapolo pea afai e tatalo ai se atalii poo se afafine faauuina a le Atua. O se tasi ua saisaitia ma le loto malie, na ulufale atu i le mailei a le tiapolo ae lē fia saoloto pe salamo ona o faamanuiaga o loo ia maua mai ia satani. Tusa pe faamalosia ona faasaolotoina lea tagata, e ono toe foi lava i le tiapolo, ma o le taimi la lea, o le a sili atu le saisaitiaga aua o temoni na tutuliese, e foi mai ma ua faafitu le malosi atu (Mataio 12:43-45).
I le tele tausaga talu ai, na matou iloa ai sa iai se taulaitu e lotu ia matou. Na matou tatalo monlona faasaolotoga, peitai na saisaitia pea. Ona matou fesili lea iai pe fia saoloto ae fai mai, ‘leai, e te manao e aveesea le malosiaga ou te pulea ai lau tane?’ E faanoanoa tele i nei ituaiga mafaufauga aua o i latou o loo auauna i le tiapolo faapea, o loo agai atu i le faafanoga e faavavau pe afai e lē fia salamo.
O se fafine ua faasolo ona maliliu lana fanau na alu i se perofeta e tatalo mo le puipuiga mo ia ma lana fanau. Na fai sana miti i se tasi po ma na faafuaseia ona iai i le agaga ma ni taulaitu fafine. Na latou faafeiloai ia te ia ma folafola o le a latou puipui i lana fanau pe afai e fai o ia ma sui o le latou vaega. Na malie iai ona o lea folafolaga, peitai ina ua maea sina taimi, ua oo i lona taimi e avatu ai le toto e feinu ai taulaitu. Na oo ina ia faaositaulaga lana tane. Ua mavae sina taimi ma ua toe oo i lona taimi e avatu ai le toto ma ua mananao taulaitu i toto o lana fanau. O le taimi la lea na ia saili ai se fesoasoani mai le Atua e faasaoina lana fanau mai le fuafuaga a le tiapolo. Faafetai i le Atua na sau i le lotu ona faasaolotoina lea o ia e le Atua.
Le au pele e, e leai se mea lelei pe tumau e ono ofoina atu e le tiapolo. Mo soo se mea e na te foai atu, e na te aveina le faitau afe mo le taui. Ou te tatalo e foai atu e le Atua ia te oe le alofa tunoa e alo ese ai mai mailei a le tiapolo. Afai o loo iai se vaega o lou olaga o loo uuina e le tiapolo ma ua e fia saoloto, ou te folafola atu ua e saoloto i le asō i le suafa o Iesu. E leai se mea lelei e ofoina mai e le tiapolo mo i latou o loo auauna ia te ia. O i latou o auauna ia te ia, o loo agai atu i le faafanoga e faavavau, i le suafa o Iesu, Amene.
