OPEN HEAVENS
MATALA LE LAGI MO LE ASO FARAILE 28 AOKUSO 2026
(tusia e Pastor EA Adeboye)
Manatu Autu: Toe faatumu, fafaga ma faafoisia 2 (Refuel, recharge, reload 2)
Tauloto Tusi Paia: Iuta 1:20 “A o outou le au pele e, ia outou atiae ia te outou i lo outou faatuatua e silisili ona paia, o le Agaga Paia tou te tatalo ai”
Faitauga - Tusi Paia: Mareko 14:32-50
O ananafi na ou talanoa atu e tatau ona toe fafaga ma faamalosia lou malosi faaleagaga. E taua tele, peitai, e tatau ona toe faatumu lou malosi faaleagaga tusa pe e te lē faalogoina le fiaai faaleagaga, ina ia saunia ai lou tagata mo mea tutupu faafuasei. O le vaega lea ou te taua, o le ‘suauu faaopoopo’. O le ‘suauu faaopoopo’, o le faaputuga o punaoa o tatalo ma anapogi ua maea ona faia, ma fuaitau o le Tusi Paia ua e taulotoina, e aoga tele mo oe pe a faafuaseia ona e fetaui ma se luitau. O le mafuaaga lea e tatau ai ona e tatalo, anapogi ma suesue i le Upu a le Atua e sili atu i lou manatu i le tulaga e te manaomia, aua a oo mai aso e te manaomia ai se malosiaga vave, e maua mai i punaoa ua e faaputuina, e vave toe faaolaola ai lou malosi.
Mo se faataitaiga, e ono oo mai faaosoosoga i se aso e te lē o malosi tele, peitai e manaomia le malosi e tetee ai. E mai lau suauu faaopoopo le malosi e te manaomia. E faapena foi pe a oo mai se tulaga lamatia pe tupu foi se faalavelave faafuasei, e tatau ona vave lou tulai e tau le taua, e faatoa mafai ona e faia pe afai o loo iai se faaputuga punaoa o suauu i totonu ia te oe. I taimi faapea, e te tautala i gagana eseese. Ao e tautala i gagana eseese, o le a e utuvai mai le punaoa o le suauu faaopoopo, ma e lei leva, o le a e faalogoina se mana faatupu malosi, ona mafai lea ona e fofoina le faafitauli ua tulai mai. Peitai, e leai se mea e mafai ona tupu pe afai e leai se suauu faaopoopo i lau punaoa tusa pe e te tautala i gagana eseese i le taimi e feagai ai ma faalavelave.
Atalii poo le afafine o le Atua, e leai ma se tagata e saunia mo se taua i le malae o taua. O le tele o taimi, e fuafua lelei e taitai au ma fitafita fuafuaga mo taua ae lei taitai ona oo mai. I le Mataio 26:36-44, o loo faamatala e le Tusi Paia taimi na tatalo faatauanau ai Iesu i le fanua i Ketesemane ae lei saisaitia o ia. Ao ia tatalo, sa momoe lona au soo, ma ina ua oo mai luitau, sa leai se suauu faaopoopo e utuvai mai ai, o lea na sosola. Na faafiti Peteru ia Iesu, ae na faavaivai uma le au soo o puapuaga ona e laitiiti lo latou malosi (Faataoto 24:10).
Le au pele e, tatalo e sili atu i le tulaga e te manatu e te manaomia ae lei oo mai aso o luitau ma puapuaga. E lē taitai faamaimauina le taimi e te tatalo ai. Tautala i gagana eseese ia faifai pea, ma faaalu lou taimi i luma o le nofoalii o le Atua aua a oo mai le aso o puapuaga, e lava ma totoe le suauu faaopoopo e te utuvai mai ai mo le malosi faaopoopo.
Tatalo,
Tamā, faamolemole fesoasoani mai ia te au ina ia ou faamaoni i le tatalo ma ia ou fiafia e suesue i lau Upu i aso uma, i le suafa o Iesu, Amene.
