OPEN HEAVENS
MATALA LE LAGI MO LE ASO SA 30 AOKUSO 2026
(tusia e Pastor EA Adeboye)
Manatu Autu: Aua e te faapologa ia te oe lava 2 (Don’t over work yourself 2)
Tauloto Tusi Paia: Kenese 31:17 “O le fa‘ailoga lea e fa‘avavau ‘iā te a‘u ‘atoa ma le fānauga a Isaraelu auā o aso e ono na fai ai e le ALI‘I le lagi ‘atoa ma le lalolagi; a o le aso fitu na ia mālōlō ai ma mapu ai.”
Faitauga - Tusi Paia: Esoto 20:8-11
Ina ua avea a’u ma taitai aoao o le Ekalesia RCCG, sa ou popole lava i le tupu o le lotu ma o lea sa ou anapogi, tatalo ma lauga mo le tele o tausaga e aunoa ma se malolo pe o se malologa foi i seisi nofoaga. E lei leva ae ou maitauina, e lē atoa ona ou lauga mo se 15 minute ae amata ona tau leai so’u leo. Na ou faia le fautuaga a le toatele o tagata e fai mai e inu le ti e tuu iai le meli, peitai na faaauau pea le faafitauli.
O se tasi tina matua, ua ia iloa le mafuaaga ma faapea mai, ‘o loo e ma’i i le mai matou te tau’a, o le ma’i o faiaoga. O loo e aoao tagata e aunoa ma le faamaloloina o lou leo, o lena ua tetee mai le leo’. Na ou fai iai poo le a le fofo, ae faapea mai, ‘aua e te tautala mo le 15 aso’. Na ou tali atu, ‘e faapefea ona ou faia ona o le tele o a’u galuega’. Na tali mai e faapea, ‘afai e oo i le tulaga e leai ai se leo i le maea ai o le 5 minute o le lauga, e tatau loa ona e faia le mea o loo ou fai atu ai’. O lea, mo le taimi muamua talu ona tofia au i le taitai aoao o le Ekalesia, ua faia sau malologa i Siamani. Sa ou nofo i le fale o se tagata e iai le potu vevela e faaafu ai tagata i totonu o lona fale. Fai mai e faamafanafanaina ai le tino e amata mai totonu i fafo, a ou ulufale e tatau ona ou sau i fafo pe a maea le 15 minute. E uma ane le 5 minute, e leai ma se afu, faasolo atu i le 10 minute e leai lava, seia oo ina atoa le 15 minute ae faatoa tau sau sina afu laitiiti. Na ou nofo ai i le potu lea mo le 45 minute ona faatoa maua lea o le afu. Sa ou tuua lou tino e tauave le tele o luitau, ma ua lē gaoioi lelei i le tulaga e tatau ona iai. Na amata mai ai loa, ua aoaoina au e lē tatau ona ou faapologa ia te au lava ma e tatau ona ou malolo mai lea taimi i lea taimi pe afai ou te manao e faataunuuina le galuega ua tuuina mai e le Atua i te a’u.
I le Esoto 20:1-17, na tuu atu e le Atua ia Mose tulafono e 10, e te iloa ai e fa fuaiupu o loo faamamafa ai le Sapati. Na faamamafa mai e le Atua i lana fanau le taua ma le manaomia o le malolo i le Aso Sapati ma ia faapaiaina. Na toe faamamafa mai e le Atua le taua o le Sapati i le Esoto 31:12-17, ina ua ia faatonuina Mose o soo se tagata e na te soli le tulafono o le Sapati, e tatau ona faaoo iai le oti.
Le au pele e, o le malolo mai le taimi i lea taimi e taua tele. A e fai ma malolo i le tulaga e tatau ona iai, o le a faafouina ma faasaoina pea lou tagata. E tatau lava ona e fai ma malolo pe afai e te naunau e ausia fuafuaga a le Atua mo lou olaga, i le suafa o Iesu, Amene.
